अम्मा री घड़ी
अम्मा मेरी थी बेशक अणपढ़,
पर थी से बड्डी अक्लमंद।
घड़ीया ते टेम कदी देखणा नी आया
पर टेमों री थी बहोत ई पाबन्द।
धयाडिया जो धूप होर छाँव,
राती जो आसमानां रे तारे।
मुर्गे री बांग था भयागा रा लार्म,
सुणी के उठूं थे से लोक सारे।
भयाणु तारा जेबे निकल्या
समझो हुणे लागी सबेर।
पहलां उठी के मेहसी दुहणी
कदी नी देखीं हुन्दी देर।
काम करना नाले हाकां पाणी
उठी जाओ भाऊ करो तैयारी।
सकुला जाणे रा टेम हुइगा
फटाफट निकलो खाइके नवारी।
रोशनदानों ते औंदी धुप्प,
दिन चढ़ने रा देउं थी सनेआ।
बेहड़े री कांधा पर लाइके नसाणी
स्कूलों जाणे रा टेम था बनेआ।
पैरां हेठै जेबे आओ पडछावां,
समझो दिनां रे बाजीगे बाराँ
पारलिया धारा धुप्प जेबे चलीगी,
घरां जो आणे लागी पंछियां री डारां।
एकी एकी घड़िया, एकी एकी पला रा
घड़िया ते बिना सारा हसाब था।
आजकल बोलदे पढ़े लिखे छोरु
बई पहलां रा टेम बहौत खराब था।
बेशक घड़िया नी थी, पर टेम बहौत था
पैदल चलदेयाँ मुकु नी थी बाटां।
बेशक लोकां गे आज महंगी महंगी घड़ियां
फेर बी तीनां गे टेमो रा घाटा।।
- हरिराम धीमान